Ապակառուցողական վարքին նվիրված սեմինար ՀՀ ԳԱԱ ԳԿՄԿ-ում
Մարտի 28, 2025
Ապակառուցողական վարքը, լինելով շեղված վարքի տարատեսակներից, գտնվում է հոգեբանական հետազոտությունների և կլինիկական հոգեբանության արդիական խնդիրների դաշտում։ Պատահական չէ, որ ՀՀ ԳԱԱ ԳԿՄԿ հոգեբանության ամբիոնի կողմից կազմակերպված հերթական գիտագործնական սեմինարը նվիրված էր հենց այս խնդրին։
2025 թ. մարտի 27-ին ԳԿՄԿ-ում կայացած սեմինարի թեման էր` «Ապակառուցողական վարք՝ պատճառահետևանքային կապեր, հաղթահարման ուղիներ»: Բանախոսը ոլորտի առաջատար մասնագետ, հոգեբանական գիտությունների դոկտոր, պրոֆեսոր Կամո Վարդանյանն էր։
Սեմինարը բացեց ԳԿՄԿ հոգեբանության ամբիոնի վարիչ, հոգեբանական գիտությունների դոկտոր, պրոֆեսոր Նաիրա Հակոբյանը, որ, ողջունելով ներկաներին, ներկայացրեց պրոֆեսոր Վարդանյանի մասնագիտական գործունեության մի շարք դրվագներ, ապա խոսքը տրամադրեց նրան։
Ինչպես նշեց բանախոսը, «ապակառուցողական վարք» ասվածը մասնագիտական գրականության մեջ արժանացել է ոչ միայն տարբեր մեկնաբանությունների, այլև տարբեր սահմանումների։ Ամենատարբեր հեղինակների սահմանումներին հպանցիկ անդրադարձ կատարելուց հետո պրոֆեսորը ներկայացրեց իր հեղինակային սահմանումը. «Դեստրուկտիվ է այն վարքը, որը միտված է ներքին և արտաքին միջավայրերի հարաբերական կայունության (հոմեոստազ), կարգ ու կանոնի, հավասարակշռված համակարգերի, հարաբերական հանգստի վիճակի խաթարմանը՝ ընդհուպ քաոսի առաջացմանը կամ դրանց ոչնչացմանը»։
Հենց այս սահմանման վրա էլ կառուցվեց սեմինարի ողջ բովանդակությունը։ Անդրադարձ կատարվեց ապակառուցողական վարքի ախտանիշներին, ապակառուցողական վարքի երկու տեսակներին՝ աուտոդեստրուկտիվ և հետերոդեստրուկտիվ, մանրամասնվեցին աուտոագրեսիվ վարքի տեսակները, պատկերացում տրվեց ապակառուցողական վարքի նեյրոֆիզիոլոգիական, կենսաքիմիական, հոգեբուժական և հոգեբանական մեխանիզմների մասին։
Սեմինարի մասնակիցները, որ ներկայացնում էին տարբեր մասնագիտական ոլորտներ և տարբեր հաստատություններ, մեծ բավականություն ստացան խորագետ մասնագետի վարած դասախոսությունից։
Հարցուպատասխանի մասը շատ ակտիվ ստացվեց՝ չդադարող հարցերի շարքով, ինչը վկայում էր լսարանի հետաքրքրվածության բարձր մակարդակի և նմանատիպ սեմինարների կազմակերպման պահանջարկի մասին։ Լսարանին հատկապես գրավեց այն հանգամանքը, որ պրոֆեսոր Վարդանյանը ապակառուցողական վարքի մասին ասվածը հիմնավորում էր իր հարուստ հոգեբանական և մանկավարժական պրակտիկայի փորձով։
ՀՀ ԳԱԱ ԳԿՄԿ հանրային կապերի և կարիերայի բաժին
