Ներքին մշտադիտարկում անցավ ՀՀ ԳԱԱ ԳԿՄԿ «Կրթության կառավարում» մագիստրոսական կրթական ծրագիրը
Մարտի 27, 2025
2025 թվականի մարտի 26-ին, ի շարունակություն ԳԿՄԿ-ում իրականացվող ամբիոնների ներքին մշտադիրակման գործընթացի, մշտադիտարկվեց ՀՀ ԳԱԱ գիտակրթական միջազգային կենտրոնի մանկավարժության ամբիոնի «Կրթության կառավարում» մագիստրոսական ծրագիրը։ Մշտադիտարկումն իրականացվեց մշտադիտարկման խմբի կողմից՝ արտաքին փորձագետի մասնակցությամբ։
Կրթական ծրագիրը, որը մեկնարկել է 2021-ից, հասցրել է գրանցել շոշափելի հաջողություններ, որ արտահայտված էին ԳԿՄԿ դեկան Ատոմ Մխիթարյանի՝ կրթական ծրագիրը ներկայացնող խոսքում և սահիկաշարում։
Ամբիոնի ուժեղ կողմերից մեկը պրոֆեսորադասախոսական կազմն է, որում բոլորը գիտական աստիճան ունեցողներ են, ընդ որում՝ նրանք ներկայացնում են գիտության տարբեր բնագավառներ՝ ապահովելով կրթության կառավարման ոլորտի համար կարևոր մասնագիտական բազմազանությունը։ Ներկայացվեց կրթական ծրագրի կառուցվածքը՝ կրեդիտների բաշխվածությամբ․ ծրագիրն ունի բովանդակային 3 մասնաշերտ՝ մանկավարժական, կառավարման և առաջնորդության։ Անդրադարձ կատարվեց ծրագրի միջոցով տրամադրվող աշխատանքային հեռանկարներին, դրանց հաջողելու ուղղությամբ իրականացվող քայլերին։
Ներկայացված տվյալները խոսեցին այն մասին, որ ՀՀ ԳԱԱ ԳԿՄԿ «Կրթության կառավարում» մագիստրոսական կրթական ծրագիրը մեկտեղում է մանկավարժական ակադեմիական գիտելիքը և կառավարման ու կրթության կազմակերպման ոլորտների արդիական փորձն ու գործիքակազմը՝ շրջանավարտների համար ապահովելով կրթության տարբեր մակարդակներում որպես կառավարիչ վստահ մուտք գործելու, ոլորտում հետազոտական աշխատանքներով աչքի ընկնելու, գիտության մեջ նոր խոսք ասելու որակներ։
Ի պատասխան փորձագետների հարցերի՝ ամբիոնի վարիչը՝ մանկավարժական գիտությունների դոկտոր, պրոֆեսոր Հայկ Պետրոսյանը, հանգամանալից ներկայացրեց ամբիոնում իրականացվող կրթական քաղաքականության ընթացքը, խնդիրների վերհանման և դրանց լուծումներ տալու ուղիները։
Քննության առնվեց նաև կրթական ծրագրի փաստաթղթային փաթեթը։
Խմբի անդամները ծավալեցին ակտիվ և կառուցողական հարցուպատասխան։ Ստացած տպավորությունը դրական էր, ինչի արձանագրումը՝ դիտարկումներով հանդերձ, առաջիկայում կքննարկվի ՀՀ ԳԱԱ ԳԿՄԿ մանկավարժության ամբիոնի նիստում։
ՀՀ ԳԱԱ ԳԿՄԿ հանրային կապերի և կարիերայի բաժին
