Ուսումնագիտական կոնֆերանս ՀՀ ԳԱԱ Գիտակրթական միջազգային կենտրոնում
Նոյեմբերի 29, 2015
Սերը հայրենիքի նկատմամբ սկսվում է ընտանիքից:
Ֆրենսիս Բեկոն
ՀՀ ԳԱԱ Գիտակրթական միջազգային կենտրոնում սույն թվականի նոյեմբերի 28-ին տեղի ունեցավ գիտաուսումնական կոնֆերանս՝ նվիրված ընտանեկան հոգեբանությանը: Կոնֆերանսին մասնակցում էին ՀՀ արդարադատության նախարարության հարկադիր կատարման ծառայության աշխատակիցներ ղեկավար անձնակազմից, «Հոգեբանություն» մասնագիտության մագիստրանտներ, ընտանեկան խնդիրների հաղթահարմամբ շահագրգիռ մասնագետներ այլ կառույցներից: Կոնֆերանսին բացման խոսքով հանդես եկավ ՀՀ ԳԱԱ Գիտակրթական միջազգային կենտրոնի դեկան, հոգեբանական գիտությունների դոկտոր, պրոֆեսոր Նաիրա Հակոբյանը: Զեկուցումներով հանդես եկան ՀՀ ԳԳ ԳԿՄԿ հոգեբանության ամբիոնի մագիստրանտները, «Ընտանեկան խորհրդատվություն և հոգեթերապիա» մասնագիտական դասընթացի շրջանակներում վերապատրաստվողները: Կոնֆերանսին հնչեցին հետաքրքիր և բազմաբովանդակ զեկուցումներ՝ ընտանեկան բռնությունների, ամուսնալուծությունների, երեխա-ծնող փոխհարաբերությունների, ընտանեկան կոնֆլիկտների ու դրանց հաղթահարման ուղիների, ներընտանեկան միջանձնային փոխհարաբերությունների, հոգեբանական խորհրդատվության ու հոգեթերապիայի վերաբերյալ, որոնք շատ արդիական էին և համահունչ փոխակերպվող հասարակության մեջ ընտանիքներում առկա հիմնախնդիրներին:
Նախանշվեցին ՀՀ ԳԱԱ ԳԿՄԿ «Հոգեբանություն» մասնագիտության մագիստրոսական համակազմի և ՀՀ արդարադատության նախարարության հարկադիր կատարման ծառայության հետագա համագործակցության հեռանկարները, շեշտադրվեցին «վնասված» ընտանիքներին հոգեբանական աջակցություն ցուցաբերելու ուղիները: Կոնֆերանսի վերջում եզրափակիչ խոսքով հանդես եկավ հոգեբանական գիտությունների թեկնածու, դոցենտ, «Ընտանեկան հոգեբանություն» դասընթացի վերապատրաստող Մ. Մեհրաբյանը:
Հարկադիր կատարման ծառայության՝ ալիմենտի բռնագանձման բաժնի պետի տեղակալ Հասմիկ Մովսիսյանը հայտնեց իր համոզմունքն այն մասին, որ այս համագործակցությունը իր ցանկալի արդյունքը կտա ընտանիքների վերջնական քայքայումը կասեցնելու գործում:
Հարկադիր կատարման ծառայության և ընտանեկան հոգեբանների համագործակցությունն ընդլայնելու հեռանկարով աշխատանքներ են իրականացվում նաև մարզերում, մասնավորապես Արարատում, Արմավիրում, Գեղարքունիքում և Վայոց Ձորում:
Սա, անշուշտ, ՀՀ ԳԿՄԿ մագիստրնտ-գործատու փոխհարաբերությունների ու փոխհամագործակցության լավագույն ձևաչափ է: