Դիպլոմների հանձնման հանդիսավոր արարողություն ՀՀ ԳԱԱ ԳԿՄԿ-ում
Մարտի 31, 2025
2025 թվականի մարտի 28-ին ՀՀ ԳԱԱ գիտակրթական միջազգային կենտրոնի դահլիճում իրենց դիպլոմներն ստացան ՀՀ ԳԱԱ ԳԿՄԿ մագիստրատուրայի առկա համակարգի 3 կրթական ծրագրերի՝ Իրավագիտության, Գործարար վարչարարության և Դեղագիտության 2024-2025 ուստարվա շրջանավարտները:
Շրջանավարտներին շնորհավորանքի և բարեմաղթանքի խոսքեր հղեցին ՀՀ ԳԱԱ ԳԿՄԿ վարչակազմի ներկայացուցիչները:
ՀՀ ԳԱԱ ԳԿՄԿ տնօրեն Արմեն Սարգսյանն իր ուղերձում նշեց.
«Սիրելի՛ շրջանավարտներ, ողջունում եմ ձեզ և շնորհավորում այս կարևոր օրվա կապակցությամբ: Իրոք, այս օրը ձեզ համար կարևոր է, քանի որ դուք ավարտում եք կյանքի մի կարևոր փուլ և ձեր մասնագիտական նոր ուղին եք հարթելու ձեր հետագա գործունեության ընթացքում:
Գիտակրթական միջազգային կենտրոնը Գիտությունների ազգային ակադեմիայի կարևոր կազմակերպություններից է, որը համակարգում է ԳԱԱ-ի կրթական գործընթացը: Կուզենամ, որ ձեր բոլորի համոզմունքը լինի այն, որ Գիտությունների ազգային ակադեմիան մեր ազգային արժեքն է, քանի որ այն հիմնվել է մեր ազգի մեծերի մասնակցությամբ՝ Վիկտոր Համբարձումյանի, Հովսեփ Օրբելու, Մանուկ Աբեղյանի և այլոց, որ մեր պետության անունը մշտապես բարձր են պահել ամբողջ աշխարհում: ԳԿՄԿ-ն այդ արժեքների կրողն ու փոխանցողն է: Լիահույս եմ, որ ձեր գործունեության ընթացքում մշտապես բարձր կպահեք մեր կենտրոնի անունը, քանի որ ձեր գործունեությունից է կախված նաև մեր կենտրոնի հեղինակությունը և հետագա զարգացումը:
Մշտապես պահպանե՛ք Կենտրոնի հետ ձեր կապը և վերադարձե՛ք որպես ոչ միայն շրջանավարտներ, այլ նաև որպես գործընկերներ: Հուսով եմ, որ ձեզանից շատերը կշարունակեն իրենց գիտակրթական ուղին նաև ասպիրանտուրայում, քանի որ, ինչպես ասել է ֆրանսիացի գիտնական Կյուրին, «Գիտությունը անհրաժեշտ է ազգին։ Այն երկիրը, որտեղ գիտությունը չի զարգանում, անխուսափելիորեն վերածվում է գաղութի»: Իսկ մեր երկրի ամենակարևոր ռեսուրսը մարդն է՝ իր գիտական պոտենցիալով, իր կրթական հնարավորություններով: Կուզենամ, որ դուք էլ այս գաղափարի կրողը և սրանով առաջնորդվողը լինեք:
Շնորհակալություն եմ հայտնում ձեր դասախոսներին, որ ոչ միայն ձեզ փոխանցել են գիտելիք, կարողություն և հմտություն, այլև ձեզ համար ապահովել են ակադեմիական բարենպաստ միջավայր՝ ձեր կրթությունն արդյունավետ կազմակերպելու համար։ Վստահ եմ, որ դուք հետագայում ունենալու եք մասնագիտական հաջողություններ, և որոշներդ ձեր գործունեությունը շարունակելու եք նաև որպես դասախոսներ, գիտնականներ:
Շնորհավորում եմ ձեզ, մաղթում հաջողություններ, կանաչ ճանապարհ ձեր մասնագիտական և անձնական կյանքում: Մշտապես եղե՛ք վստահ և շարժվե՛ք առաջ ձեր բոլոր մղումներում, ձեր բոլոր նախաձեռնություններում, ունեցե՛ք ձեր ներդրումը մեր պետության զարգացման գործում: Շնորհավորում եմ բոլորիդ և մաղթում նորանոր հաջողություններ»:
Հաջորդիվ արտահայտվեցին Դեղագործական քիմիայի ամբիոնի վարիչ Արփինե Հարությունյանը, Տնտեսագիտության և կառավարման ամբիոնի վարիչ Կարեն Սարգսյանը և Իրավագիտության ամբիոնի դասախոս Լիլիթ Խառատյանը: Շնորհավորելով իրենց ամբիոնների թողարկած շրջանավարտներին և հղելով բարեմաղթանքի ջերմ խոսքեր՝ նրանք պատգամներ հղեցին նորընծա մագիստրոսներին՝ իրենց փոխանցված ակադեմիական գիտելիքները ի շահ մեր պետության ու ազգի ծառայեցնելու, Կենտրոնի անունը միշտ բարձր պահելու և Կենտրոնի հետ մշտապես կապը պահպանելու բովանդակությամբ: Ա. Հարությունյանը, մասնավորապես, հորդորեց մշտապես հիշել դեղագետ-դեղագործի բարձր առաքելության և պատասխանատու մասնագիտություն լինելու մասին, Կ. Սարգսյանը հորդորեց ստացած գիտելիքները մշտապես կատարելագործել՝ հետ չմնալու համար արագ զարգացող գիտությունից և տեխնոլոգիաներից, իսկ Լ. Խառատյանը հորդորեց միշտ բարձր պահել իրավաբան մագիստրոսի նշաձողը՝ գործնականում մշտապես առաջնորդվելով արդարության և մարդասիրության սկզբունքներով, լինել արդարադատ, առաջնորդվել իրավունքի գերակայությամբ:
Հասուն և տպավորիչ էին շրջանավարտների հրաժեշտի խոսքերը, որ կուրսերի անունից արտահայտեցին իրենց ներկայացուցիչները:
Գործարար վարչարարության կուրսի անունից արտահայտվեց ավագը՝ գերազանց շրջանավարտ Հայկ Տիրացվյանը՝ իր խոսքում նշելով. «Գիտակրթական միջազգային կենտրոնի մեծարգո՛ տնօրեն, վարչական, պրոֆեսորադասախոսական կազմի հարգարժա՛ն ներակայացուցիչներ, սիրելի՛ մագիստորսներ, մեզ համար մեծ պատիվ է գտնվել այստեղ՝ ստանալու այն փաստաթուղթը, որ հավաստում է մեր գիտելիքների համապաստասխանությունը մագիստրոսի կոչմանը, աստիճանին: Գիտությունների ազգային ակադեմիան ինձ համար մշտապես հանրապետության իմացության խորհրդանիշն է եղել, և այստեղ սովորելու ընթացքում ես դրանում ավելի համոզվեցի:
Ուսման ընթացքը հեշտ չէր. մենք ստանձնում էինք պատասխանատվություն և բախվում բարդ առաջադրանքների, սակայն քայլում էինք հստակ և ինքնավստահ, քանի որ մեր կողքին ունեինք ոլորտի գիտակ, բանիմաց, իմաստուն մասնագետներ՝ ամբիոնի վարիչ պարոն Սարգսյանի գլխավորությամբ: Ձևավորվել էր միաջավայր, որտեղ առկա էր դասախոսների նվիրվածությունը, նրանց հոգատարությունը, և, ընդհանուր առմամբ, ջերմ էր միջավայրը:
Սիրելի՛ մագիստրոսներ, սրտանց շնորհավորում եմ բոլորիս այս ձեռքբերման կապակցությամբ: Թող մեր ստացած գիտելիքները ճանապարհ հարթեն դեպի նոր նվաճումներ՝ ի փառս մեր հայրենիքի անվտանգության և հայ ժողովրդի բարօրության:
Եզրափակելով մաղթում եմ մեր գիտակրթական միջազգային կենտրոնին շարունակական զարգացում և բարգավաճում: Թող ոչինչ ի զորու չլինի խանգարելու այն վեհ առաքելությանը, որ իրականացվում է այստեղ: Աստծո օրհնությունը բոլորիս հետ»:
Նույն կուրսից արտահայտվեց նաև Ժորա Իսպիրյանը՝ շնորհակալություն հայտնելով ամբիոնի և Կենտրոնի ղեկավարությանը՝ թիմային ոգի ձևավորելու, իրենց սեփական կյանքի փորձի վրա հիմնված արժեքավոր խորհուրդներ փոխանցելու և ամեն կերպ աջակցելու համար:
Դեղագիտության կուրսի անունից արտահայտվեց ավագը՝ գերազանց շրջանավարտ Աննա Հովհաննիսյանը՝ նշելով․ «Շնորհավորում եմ բոլորիս: Թույլ տվեք դեղագիտության բաժնի շրջանավարտների անունից շնորհակալություն հայտնել ԳԿՄԿ-ի ողջ անձնակազմին՝ իրենց ջերմ վերաբերմունքի համար: Ուզում ենք շնորհակալություն հայտնել մեր պրոֆեսորադախոսական ողջ անձնակազմին՝ իրենց գիտելիքները մեզ փոխանցելու համար, միշտ օգնելու համար, և առանձնահատուկ շնորհակալություն հայտնել մեր ամբիոնի վարիչին և մեր թեզերի ղեկավարներին: Շնորհակալ ենք ձեզնից՝ մեր կողքին լինելու և բոլոր հարցերում մեզ աջակցելու համար»:
Իրավագետների կուրսի անունից արտահայտվեց գերազանց շրջանավարտ Սիլվարդ Տիգրանյանը՝ իր խոսքում նշելով. «Գիտակրթական միջազգային կենտրոնի հարգարժա՛ն տնօրեն, պրոֆեսորադասախոսական կազմի և վարչակազմի հարգարժա՛ն ներակայացուցիչներ, շնորհակալություն եմ հայտնում մեր ողջ կուրսի անունից՝ այսօրվա դիպլոմները հանձնելու հանդիսավոր արարողության և գերհագեցած մագիստրոսական բովանդակային ծրագրի համար: Առանձնահատուկ շնորհակալություն մեր ամբիոնի վարիչ պարոն Բաբայանին, որ թեև այս պահին այստեղ չէ, բայց արժանի է մեծ շնորհակալության: Շնորհակալություն նաև մեզ դասավանդած պրոֆեսորադասախոսական ողջ կազմին: Բացի գիտելիքները և հմտությունները, որ վերցնում ենք՝ կարևոր արժեքներ կան, որոնց կրողը պիտի լինենք հետո, և կարևոր է, թե ով է դասավանդում տվյալ առարկան և ինչպես է դա անում, որովհետև մարդիկ կան, ազգանուններ կան, որոնք հետո դառնում են կյանքի դասախոս: Տարիներ ի վեր այդ ազգանունը մեզ հետ ապրում է․ ինչ-որ դասընթացի ժամանակ հնչած ինչ-որ խոսք մեզ համար խրատի պես ողջ կյանքում գնում է: Մենք ունեցել ենք այդպիսի դասախոսներ: Չեմ ուզում կոնկրետ ազգանուններ տալ, որովհետև չկա դասախոս, որի դասին իմիջիայլոց ենք վերաբերվել, հետևաբար՝ առանձնահատուկ շնորհակալություն բոլորին: Շնորհակալություն նաև վարչակազմի ներկայացուցիչներին, դեկանատի աշխատակիցներին՝ ջերմ, բարեհամբույր վերաբերմունքի համար:
Շնորհավորելով բոլորիս՝ մաղթում եմ, որ այս թե՛ կարմիր, թե՛ կապույտ դիպլոմները ծառայեն ի շահ մեր հայրենիքի ու պետության, որովհետև հիմա առավել քան երբևէ մեր հայրենիքին պետք է ոչ միայն բանիմաց, այլև բարձր արժեքներ կրող նոր սերունդ: Շնորհակալություն»:
Շրջանավարտների խոսքերը եկան հաստատելու, որ ԳԿՄԿ-ում իրենց փոխանցված բարձր արժեքները տեղ են հասել, և մագիստրոսները գիտակցում են իրենց դերը Հայաստանի Հանրապետությունը հզորացնելու գործում:
ՀՀ ԳԱԱ ԳԿՄԿ հանրային կապերի և կարիերայի բաժին
