Բարելավման պլանով նախատեսված գործողությունների մշտադիտարկում ԳԿՄԿ-ում
Մարտի 28, 2025
2025 թվականի մարտի 27-ին ՀՀ ԳԱԱ գիտակրթական միջազգային կենտրոնում կայացավ ԳԿՄԿ գիտական խորհրդին կից որակի ապահովման մշտական հանձնաժողովի նիստ՝ մշտադիտարկելու Կենտրոնի բարելավման պլանով նախատեսված գործողությունների ընթացքը: Նպատակը՝ վեր հանել և սահմանված ժամկետներում շտկել բացթողումները, արձանագրել և համապատասխան փաստաթղթային հիմքերով ամբողջացնել կատարված աշխատանքների փաթեթը։
Նիստին ներկա էին ՀՀ ԳԱԱ ԳԿՄԿ տնօրեն Արմեն Սարգսյանը, ԳԿՄԿ որակի ապահովման մշտական հանձնաժողովի անդամները և Կենտրոնի ստորաբաժանումների ղեկավարները։
Հանդիպումը բացեց տնօրենը՝ իր խոսքում ընդգծելով հրավիրված ժողովի կարևորությունը և ողջունելով ԳԿՄԿ կրթության որակի ապահովման բաժնի հետևողականությունը՝ բարելավման պլանով նախատեսված գործողությունների ընթացքին հետևելու, խնդիրների դեպքում բաժնի մեթոդական աջակցությունն ապահովելու հարցերում: Տնօրենը կարևորեց նաև հրավիրված աշխատակիցների պատրաստակամությունը՝ իրենց ղեկավարած բաժինների մասով Կենտրոնի բարելավման գործընթացներում գործուն մասնակցություն ունենալու հարցում:
Նիստը համակարգում էր ՀՀ ԳԱԱ ԳԿՄԿ կրթության որակի ապահովման բաժնի պետ, ԳԿՄԿ որակի ապահովման մշտական հանձնաժողովի նախագահ Նարինե Վարդանյանը, որ, առաջնորդվելով բարելավման պլանի կետերով, արձանագրեց նախատեսված գործողությունների ընթացիկ վիճակն ու առաջիկա անելիքները: Գործողությունների համար պատասխանատու աշխատակիցները զեկուցեցին դրանց ընթացքի և հետագա գործողությունների մասին:
Հանդիպումն արդյունավետ էր, ինչն ամփոփվեց հետագա աշխատանքների ուղղությամբ կատարվելիք գործողությունների նախանշմամբ և համապատասխան պատասխանատուների սահմանմամբ:
ՀՀ ԳԱԱ ԳԿՄԿ հանրային կապերի և կարիերայի բաժին
