ԳԿՄԿ ամբիոնների ներքին մշտադիտարկում․ Բնապահպանության և բնօգտագործման ամբիոն
Ապրիլի 2, 2025
2025 թվականի ապրիլի 1-ին, մշտադիտարկվեց ՀՀ ԳԱԱ գիտակրթական միջազգային կենտրոնի «Բնապահպանություն և բնօգտագործում» ամբիոնը։ Գործընթացն իրականացվեց մշտադիտարկման խմբի կողմից՝ արտաքին փորձագետի մասնակցությամբ։
Կրթական ծրագիրը, որը մեկնարկել է 2010-ից, անցել է կայացման վստահ ուղի՝ գրանցելով շոշափելի հաջողություններ, որ արտահայտված էին ամբիոնի վարիչ, աշխարհագրական գիտությունների թեկնածու Լիլիթ Սահակյանի՝ կրթական ծրագիրը ներկայացնող խոսքում և սահիկաշարում։
Ամբիոնի ուժեղ կողմերից մեկը պրոֆեսորադասախոսական կազմն է, որում բոլորը գիտական աստիճան ունեցողներ են՝ ակտիվորեն ընդգրկված տեղական և միջազգային ամենատարբեր ոլորտային նախագծերում։ Ինչպես փաստեցին ամբիոնի վարիչի ներկայացումը և մշտադիտարկող խմբում ծավալված քննարկումը, ամբիոնի հաջողությունների մեջ ամենից ընդգծվածը նրա միջազգայնացման ոլորտն է՝ արտահայտված թե՛ միջազգային համատեղ ծրագրեր իրականացնելու, թե՛ արտերկրում ատենախոսություն պաշտպանած լինելու, թե՛ բարձր վարկանիշավորում ունեցող ամսագրերում հրապարակումներ ունենալու, թե՛ ակադեմիական փոխանակման ծրագրերի մասնակցության հարուստ փորձով։
Ամբիոնի վարիչի ելույթում ներկայացվեց «Բնապահպանություն և բնօգտագործում» մագիստրոսական կրթական ծրագրի կազմակերպման մեթոդական գործիքակազմը՝ ներառելով ամբիոնի նորարարական լուծումները։
Պարզ դարձավ, որ մագիստրանտների հետ աշխատանքում ամբիոնն ակտիվորեն կատարում է ինքնանդրադարձում՝ պարբերաբար թարմացնելով, բարելավելով իր գիտակրթական մեթոդաբանությունը՝ արձագանքելով նաև ԳԿՄԿ կրթության որակի ապահովման բաժնի կողմից ներկայացված առաջարկներին։
Կրթական ծրագրի հաջողություններից է նաև այն, որ բոլոր մագիստրանտները ուսմանը զուգահեռ արդեն իսկ աշխատում են մասնագիտությամբ։
Հաջողություններից զատ՝ ներկայացվեցին նաև կրթական ծրագրի իրականացման ճանապարհին արձանագրված խնդիրները՝ դրանց պատճառաբանությամբ և հաղթահարման քայլերով հանդերձ։
Քննության առնվեց նաև կրթական ծրագրի փաստաթղթային փաթեթը։
Խմբի անդամները ծավալեցին ակտիվ և կառուցողական հարցուպատասխան՝ ըստ մշտադիտարկման գործընթացի համար սահմանված կետերի։
Ստացած տպավորությունը դրական էր, ինչի արձանագրումը՝ դիտարկումներով հանդերձ, առաջիկայում կքննարկվի ԳԿՄԿ բնապահպանության և բնօգտագործման ամբիոնի նիստում։
ՀՀ ԳԱԱ ԳԿՄԿ հանրային կապերի և կարիերայի բաժին
