էրազմուս+ ազգային գրասենյակի մշտադիտարկման այցը ԳԿՄԿ-ում
Դեկտեմբերի 5, 2019
Ս/թ նոյեմբերի 29-ին տեղի ունեցավ Էրազմուս+ կարողությունների զարգացման ՄԵՆՎԻՊՐՈ ծրագրի մշտադիտարկումը Էրազմուս+ ծրագրի ազգային գրասենյակի կողմից էկոկենտրոնում տեղակայված ԳԿՄԿ Բնապահպանության և բնօգտագործման ամբիոնում:
Էրազմուս+ ծրագրի ազգային գրասենյակի աշխատակիցներ Լանա Կառլովան և Անի Թորոսյանը, ԳԿՄԿ և էկոկենտրոնի համակարգող թիմը, Գավառի պետական համալսարանի պրոռեկտոր Արսեն Ապրոյանը, ինչպես նաև ԳԿՄԿ Բնապահպանության և բնօգտագործման ամբիոնի դասախոսական կազմը մասնակցեցին այս հանդիպմանը:
ՄԵՆՎԻՊՐՈ ծրագրի տեղական համակարգող Գևորգ Տեփանոսյանը հակիրճ ներկայացրեց մինչ այժմ իրականացված գործողությունները, ձեռք բերված արդյունքները և նախատեսված գործառնությունները, որոնցից հիմնական արդյունքներն են նոր մշակվող/արդիականացվող դասընթացների համեմատական վերլուծությունը /բենչմարքինգ/, ՀՀ-ում բնապահպանական կրթության ՍՎՈԹ վերլուծությունը, ինչպես նաև էլեկտրոնային մանրադիտակի ձեռքբերումը միջհամալսարանական կրթական և գիտահետազոտական լաբորատորիայի շրջանակներում՝ եզակի լաբորատորիա, որտեղ կիրականացվեն ուսանողական, արտաքին շահառուների հետ համագործակցային տարբեր նախագծեր:
Այնուհետև մշտադիտարկման մասնակիցները այցելեցին նորաստեղծ Վիրտուալ կոնֆերանսների սենյակ և լաբորատորիա, ինչպես նաև հնարավորություն ունեցան զրուցել ծրագրում ներգրավված դասախոսական կազմի հետ:
Էրազմուս+ ծրագրի ազգային գրասենյակի համակարգող Լանա Կառլովան անդրադարձավ ՄԵՆՎԻՊՐՈ ծրագրի շրջանակներում իրականացված գործողություններին, այցի ընթացքում բարձրաձայնված կարծիքներին և առաջարկներին և ընդհանուր ծրագրի իրականացման բարելավմանն ուղղված մի շարք առաջարկներ արեց:
