Մեկնարկեց «Լինենք իրազեկ և պաշտպանված» խորագիրը կրող իրավաբանական 3-րդ դպրոցը

Ս/թ սեպտեմբերի 17-ին մեկնարկեց ՀՀ ԳԱԱ գիտակրթական միջազգային կենտրոնի իրավագիտության ամբիոնի, հանրային կապերի և կարիերայի բաժնի, ինչպես նաև ՈւԽ նախաձեռնությամբ կազմակերպվող «Լինենք իրազեկ և պաշտպանված» խորագիրը կրող իրավաբանական 3-րդ դպրոցը, որը կգործի մինչև հոկտեմբերի 3-ը:

Դպրոցի շրջանակներում մատուցվող դասընթացները, որոնք վարում են Հայաստանի Հանրապետությունում և նրա սահմաններից դուրս իրավագիտության ոլորտին առնչվող լավագույն մասնագետներն ու դասախոսները, կնպաստեն հասարակության իրավագիտակցության բարձրացմանը, պարզ իրավաբանական գիտելիքների ձեռքբերմանը, տեսական և գործնական հմտությունների ձևավորմանը:

Դասընթացների վերջում մասնակիցները կստանան մասնակցության հավաստագրեր: Հավաստագրեր ստանալու համար անհրաժեշտ պայման է ունկնդրի 80 % մասնակցությունը դասախոսություններին:

Դասընթացներն ունեն հետևյալ ուղղվածությունները՝

1. Մարդու իրավունքներ
2. Եվրոպական դատարանի նախադեպային պրակտիկա
3. Ժառանգական իրավունք
4. Բանկային իրավունք
5. Անձանց քրեաիրավական պաշտպանություն և քրեական գործեր
6. Մտավոր սեփականություն
7. Իրավաբանական հմտություններ (իրավաբանական տեխնիկա և իրավաբանական գրագրություն)
8. Պայմանագրային իրավունք
9. Միջազգային իրավունք

Առաջին դասին դասախոսությամբ հանդես եկավ ԵՊՀ պետության և իրավունքի տեսության և պատմության ամբիոնի դոցենտ Տարոն Սիմոնյանը: Հանդիպման սկզբում Տ. Սիմոնյանը ողջունելով դպրոցի բոլոր ունկնդիրներին և կազմակերպիչներին՝ կարևորեց իրավունքի իմացությունը, շնորհակալություն հայտնեց հրավերի և համագործակցության առաջարկի համար:

Դասախոսության ընթացքում ներկայացվեցին ազգային շահի պաշտպանության միջազգային իրավական կառուցակարգերը, Հայոց ցեղասպանության ճանաչման հիմնահարցը, արցախյան հիմնախնդրը, Հայաստանի Հանրապետության առջև ծառացած խնդիրները և դրանց հաղթահարման ուղիների տարբերակները:

Նշենք, որ բոլոր դասընթացները հասանելի են հասրակության տարբեր խմբերին և  անցկացվում են բացառապես անվճար հիմունքներով:  Մասնակցության հայտ է ներկայացրել 116 քաղաքացի:

ՀՀ ԳԱԱ ԳԿՄԿ հանրային կապերի և կարիերայի բաժին