Դոկտորական դպրոցների ձևավորման ուղին ARMDOCT ծրագրի ընթացիկ աշխատանքների առանցքում
Ապրիլի 21, 2023![](/resources/isec/img/articles/small/1682083041-9074.png)
Ս.թ. ապրիլին ARMDOCT ծրագրի հայաստանյան գործընկերներն առցանց հանդիպում անցկացրեցին՝ քննարկելու ինչպես երկարաժամկետ ծրագրի իրականացման ընթացքը, այնպես էլ տարբեր աշխատանքային փաթեթներով նախատեսված գործողությունների առաջընթացը:
Հանդիպման ընթացքում գործընկեր կառույցներից յուրաքանչյուրը ներկայացրեց դոկտորական դպրոցների ներդրման և զարգացման ուղղությամբ իրականացված և նախատեսվող աշխատանքները: Հիշեցնենք, որ ԱՐՄԴՈԿՏ ծրագիրը նպատակ ունի զարգացնել դոկտորական (բարձրագույն կրթության երրորդ մակարդակ) կրթական ծրագրեր տարբեր ոլորտներում և ՀՀ տարբեր բուհերում: Յուրաքանչյուր նմանատիպ ծրագիր իր առջև խնդիր է դնում բավարարել Հայաստանի բարձրագույն կրթության հատուկ կարիքներն ու դիմակայել մարտահրավերներին, ուսանողներին տրամադրել ժամանակակից նորարարական հմտություններ և գիտելիքներ, որոնք անհրաժեշտ են իրենց ոլորտներում առաջատար դառնալու համար:
Համագործակցային միջգիտակարգային դոկտորական դպրոցի ձևավորման և զարգացման ուղղությամբ տարվող աշխատանքների մասին բանավոր ներկայացմամբ հանդես եկավ ՀՀ ԳԱԱ գիտակրթական միջազգային կենտրոնի որակի ապահովման բաժնի պետ Նարինե Վարդանյանը: Նա մանրամասն պատմեց «Կայուն զարգացում» դոկտորական դպրոցի ձևավորման ընթացիկ աշխատանքների, մշակվող փաստաթղթային փաթեթի և կրթական ծրագրով նախատեսվող առարկայացանկերի հիմնական ուղղվածությունների մասին, խոսեց համագործակցային դոկտորական դպրոցի հնարավոր կառուցվածքի և կառավարման մարմինների և դրանց գործառույթների մասին:
Դոկտորական դպրոցների և ARMDOCT ծրագրի մանրամասներին կարելի է ծանոթանալ ինչպես ԳԿՄԿ նորություններ բաժնում, այնպես էլ ԱՐՄԴՈԿՏ ծրագրի պաշտոնական կայքում՝ https://armdoct.com/:
ՀՀ ԳԱԱ ԳԿՄԿ հանրային կապերի և կարիերայի բաժին