ԳԿՄԿ մագիստրանտները դարձան Ձմեռ պապ Արցախի փոքրիկների համար

Պատերազմը խլեց մեզանից ամեն ինչ, կոտրեց մեր հույզերը, հույսերը, կոտրեց թևերը, մասնատեց ընտանիքները, բայց չկարողացավ մասնատել հայ ազգը: Հայը միշտ արթուն է, երբ իր օգնության կարիքն ունեն: Մի կողմ դնելով ամեն ինչ՝  կարող է նվիրվել անմնացորդ: Հազարավոր զոհեր, հազարավոր վիրավորներ, անտուն մնացած փոքրիկներ, որոնք մանուկ հասակում կորցրին իրենց մանկությունը: Ոչինչ վերադարձնել չենք կարող, չենք կարող փոխարինել իրենց ծնողներին, չենք կարող դառնալ իրենց տունը, բայց կարող ենք փոքր ժպիտ պարգևել նրանց, կարող ենք սեր, հոգատարություն և ուշադրություն տալ իրենց՝ վստահեցնելով, որ նրանց ծնողների թողած պատգամը մենք պատվով ենք ընդունում և շնորհակալ ենք, որ շնչում ու գոյատևում ենք այս հողի վրա:

Այս սուրբ գործի կայացման համար էր, որ ԳԿՄԿ հանրային կապերի և կարիերայի բաժինը ձեռնամուխ եղավ այս հրաշալի նախաձեռնությանը՝ դառնալով Ձմեռ պապ այն  փոքրիկների համար, որոնք կորցրել էին ժպտալու կարողությունը:

Հանրային կապերի և կարիերայի բաժինը ՈՒԽ-ի, ուսանողների համատեղ ջանքերով կազմեց այն նվերների ցանկը, որոնք փոքրիկները խնդրել էին Ձմեռ պապին իրենց ուղղված նամակներում:

ԳԿՄԿ յուրաքանչյուր ուսանող դարձավ Ձմեռ պապ այս փոքրիկներից յուրաքանչյուրի համար: Սեղմ ժամկետներում հավաքագրվեցին նվերները, և հանրային կապերի և կարիերայի բաժնի միջնորդությամբ ուղարկվեցին Արցախ:

Բաժինը ևս մեկ անգամ շնորհակալություն է հայտնում նախաձեռնության բոլոր աջակիցներին և շնորհավորում բոլորիս գալիք Ամանորն ու Սուրբ Ծնունդը՝ մաղթելով բարեկեցություն, խաղաղություն մեր սահմաններին և տոկունություն՝ ամուր կանգնելու և պաշտպանելու այս սուրբ հողը:

Հանրային կապերի և կարիերայի բաժին