ԳԿՄԿ շրջանավարտ Անուշավան Մուշեղյանը՝ Կոտայքի մարզի առաջին ատյանի ընդհանուր իրավասության դատարանի դատավոր

ՀՀ ԳԱԱ գիտակրթական միջազգային կենտրոնի հանրային կապերի և կարիերայի բաժինը տեղեկացնում է, որ ս/թ դեկտեմբերի 3-ին նախագահական նստավայրում հանրապետության նախագահ Արմեն Սարգսյանի մասնակցությամբ տեղի ունեցավ մի շարք դատավորների երդմնակալության պաշտոնական արարողությունը: Պատիվ ունենք նշելու, որ ՀՀ ԳԱԱ ԳԿՄԿ «Իրավագիտություն» կրթական ծրագրի շրջանավարտ Անուշավան Մուշեղյանը ևս նրանց շարքերում էր՝ որպես Կոտայքի մարզի առաջին ատյանի ընդհանուր իրավասության դատարանի դատավոր:

ԳԿՄԿ հանրային կապերի և կարիերայի բաժինը սրտանց շնորհավորում է Անուշավան Մուշեղյանին  դատավորի անչափ պատասխանատու պաշտոնը ստանձնելու համար և մաղթում նորանոր ձեռքբերումներ և հաղթանականեր ինչպես արդարադատության, այնպես էլ հանրային այլ ոլորտներում:

Հանրային կապերի և կարիերայի բաժինը զրուցել է Անուշավան Մուշեղյանի հետ. ստորև ներկայացնում ենք հատված զրույցից:

- Որքանո՞վ է ԳԿՄԿ-ում ստացած ուսումը նպաստել դատավոր դառնալու Ձեր որոշմանը։

- Ի պատասխան Ձեր առաջին հարցադրման՝ նշեմ, որ Գիտությունների ազգային ակադեմիայի գիտակրթական միջազգային կենտրոնը, ինչպես նաև իմ ուսանած մյուս ուսումնական հաստատությունները իրենց ուրույն դերն ունեցել իմ մասնագիտական հմտությունների ու գիտելիքների  ձեռքբերման գործում:

- Դուք նաև դասավանդման փորձ ունեք,  կշարունակե՞ք արդյոք մանկավարժական գործունեությունը:

- Այո ես 2018 թվականից ի վեր դասավանդում եմ Եվրոպական համալսարանի իրավագիտության ամբիոնում: Ներկայումս կանխատեսվող ծանրաբեռնվածությանը զուգահեռ կփորձեմ շարունակել դասավանդել, քանի որ մեծ սիրով և պատասխանատվությամբ եմ վերաբերվում այդ գործին:

- Դուք մշտապես աջակցել եք ԳԿՄԿ-ում կազմակերպվող իրավաբանական դպրոցի դասընթացներին, որպես փորձառու իրավաբան՝ ի՞նչ կարծիք ունեք դպրոցի և նրա ընձեռած հնարավորությունների մասին։

- Կարծում եմ Ձեր նախաձեռնությունը շատ մարդակենտրոն է և հարթակ է մասնագիտական որակավորման բարձրացման և կատարելագործման համար:

- Որպես ԳԿՄԿ շրջանավարտ և փորձառու իրավաբան՝ ի՞նչ մասնագիտական խորհուրդներ կտաք ԳԿՄԿ «Իրավաբանություն» կրթական ծրագրի մագիստրանտներին։

- Հետևյալ խորհուրդը կտայի մեր ապագա իրավաբան մասնագետներին, թող ապահովեն իրավագիտության ուսումնասիրության անընդհատությունը և զուգահեռաբար ուսումնասիրելով դատական պրակտիկան ու արտասահմանյան երկրների փորձը:

- Ո՞րն է եղել ամենամեծ ձեռքբերոմը ԳԿՄԿ-ում ուսանելու տարիներին։

- Ես միշտ լավագույն ձեռքբերում եմ համարում մարդկային ձեռքբերումը: Ուսումնառության տարիներին, բացի ընկերներ ձեռք բերելուց, նաև ստացել եմ գիտելիքներ, որոնք կիրառում եմ և դեռ շատ կկիրառեմ:

Հանրային կապերի և կարիերայի բաժին